Daniw Idiay Tapao

by Amado Yoro

Daniw Idiay Tapao: Kayarigak ti Maysa a Mula a Nagallatiw iti Sabali a Similia (Kabayatan iti Kaaddak iti Nakayanakak a Brgy Tapao, Sinait, IS)

Arigko iti mula a nayallatiw iti similia
Ti panagdakkel; ti pannakaitukit manen
Barukong daga a nagpuonan ti amin.

Ditoyak a nayanak, a nagubing iti kinaagtutubok
Subliak kadi manen nga iladawan dagiti garaw
Ti kinasiak iti nasurok uppat a dekada a naipusingak?

Birokek kadi pay laeng ti daan a salamagi wenno duog a
Mangga a nagbitinan ti kadkaduak iti diak ammo no karatay
Wenno damili tapno baliwak ti maipasngay manen?

Duogen ti singin nga algarroba ti pagilasinak duog a dadapilan
Dagiti nasapa a parbangon a panagdakiwas ni sawak
Iti nakedkedngan a dalan ti panagbaniaga sidiran ti anawang.

Panaglupos kunak man ta awanen ti daan a pinan-aw a kalapaw
Ngem dagiti irik a nayaplag iti daga kasda balitok iti kainaran
Iti sidiran daydi bunton ken pinullo a burnay-basi a lemma ti napalabas

Maysaak a mula iti umuna nga aldaw sulnitanna ti laglagip
Iti pannakayallatiw iti maikadua nga aldaw dagiti ibabangon
Iti maikatlo nga aldaw mapasubli ti baro nga init iti baro a bigat.

Agtigtig-ab idi dagiti sarusar iti kinamalig a binettek a dawa
Sabali itan ta naibartayen dagiti bimmalitok nga irik
A bilagen ti darang ti init sadanto manen maisako iti supot ti biag.

Ti kaaddak ita a simmubli, ammok, ti immuna a kunnot ti biag
Ti mula surotenna ti dam-eg ti daga a nagramutan
Ti panagsubli maysa a panangtaliaw ti kalman: rumukbos pay ti ayat
Addaak manen Sta Romana: adtoyak a nagsubli iti saklotmo.

Naidaniw kabayatan ti miting dagiti dadaulo ti barangay ken Assn of Barangay Captains nga idauluan ni ABC president Glenn Guzman ken Ex-Brgy Captain Federico Yadao ken agdama a Tapao Brgy Captain Sabino Rosete iti sango ti taengmi idi rabii ti Nobiembre 14, 2012.