HAWAII'S ONLY WEEKLY FILIPINO-AMERICAN NEWSPAPER
SERVING THE FILIPINO COMMUNITY SINCE 1993
MAY 6, 2017
PHILIPPINE LANGUAGE

Dagiti Kapampanunotan Nga Idasar Dagiti Nadumaduma A Pammati

by Pacita SALUDES

Kada pamilia idiay pagilian tayo wenno ditoy Hawaii ken amin a disso, addaanda ti bukod a pammati.  Ngamin ta nadumaduma met ti iturong dagiti adu a mangidaldalan ti PAMMATI (religion). Ti kina CATOLICO ti immuna a naipaagsep iti kapampanunotan ti kaaduan ken nagkauna a tattao idiay pagilian gapu ti panangisungsong dagiti agtuturay a Castila idiay pagilian.  Ti immuna a pammati a kina CATOLICO, sakupenna dagiti nagkauna a pamilia kadagiti nagkauna nga aldaw.

Ngem kabayatan ti panagallin ti panawen adu met dagiti natibker a saan laeng a sumursurot kadagiti ganggannaet a Kastila. Saanda amin a simmuko kadagiti kastila a nangiturong ti kina- Catolico (Romano). Inrugida metten a di sumurot kadagiti ganggannaet, nga adda bukodda a simbaan (INDEPENDIENTE) ken bukodda a padi a saan a pasurot dagiti Romano.

Ket kas ti kinabileg ti pakinakem dagiti ad-adu pay a grupo ti nabukel a kas ti Iglesia ni Cristo ken dadduma pay nga iturong met dagiti nakaadalen a papadi.  Maawagan dagitoy ti simbaan a babassit ket iti tunggal grupo, adda bukodda pagkararagan, ken bukodda a Pastor a mangidaulo. Ditoy Hawaii naisangpet met laeng dayta a pammati ket adda latta metten dagiti simbaan.

Ngem nupay adu dagiti turongen ti tao a pagkararagan saan nga ibaga a saan a maymaysa ti panggep.  Ta saan a ti papanan ti mangipakita ti aramid ken rikna.  Saan a ti disso a mapan pagkararagan ti mangipakita ti kinasiasino tayo iti imatang ti APO. Uray sadino iti ayan, adda iti rikna ken panunot a maymaysa ti Apo a pagkararagan ken pangitaklinan ti rikna panunot ken pammati. a pagdawdawatan ti pammakawan ken panagangaasi. Ni Apo a Dios ti maymaysa a mangkitkita ken mangsursurot ti kaibatugan ti kada maysa kadatayo.

Uray sadino ti ayan nga agkararag no napudno, iturong ti Apo ti kararag ken dawaten a panangngaasi, sidedengeng kadagiti ar-ararawtayo. Isu ti mangpakawan kadagiti basbasol tayo ken naglabsingan tayo kasanguanan a dumatag tayo kenkuana. Sabali manen a tawen ket kiddawentayo ti Apo nga adda latta a mangkitkita ken mangtarabay kadatayo bayat ti panagbiagtayo!

____________________________________________
© 2008-2016 Hawaii Filipino Chronicle Inc.