HAWAII'S ONLY WEEKLY FILIPINO-AMERICAN NEWSPAPER
SERVING THE FILIPINO COMMUNITY SINCE 1993
SEPT. 1, 2018

PHILIPPINE LANGUAGE

Pasken Ti Philippine Cultural Foundation of Hawaii

DAYASADAS by Pacita SALUDES

Te Deparhe PCFH ti maysa kadagiit kaunaan a Filipino nga organisasion ditoy Hawaii. Naorganisar idi 1972 babaen ti panangirusat daydi Mrs. Soledad Alconcel ket intultuloy ni Ms. Maggie Domingo. Isu ti nangidadaulo manipud idi 1968 agingga idi 2000. Ti agdama itan a presidente ket ni Janice Sevilla. Adu dagiti itungtungpal ti organisasion nga aramiden nga isaksakad ti agdama babaen ti tarabay latta ti President Emeritus, ni Ms. Maggie Domingo.

Adu dagiti rusat a nakabuklan ti PCFH. Maysa ti naindaklan a rusat ti itutulong ti organisasion ti irarang-ay ti FILCOM Center. Adu dagiti grupo a nagipaay ti tulong tapno rumang-ay laeng ti FILCOM. Makita dagiti nagnagan ti grupo ti Filipino nga inyun-una da Ms. Domingo. Di malipatan ta naisurat amin dagiti nagnagan iti diding ti FILCOM Center. Mabalinyo a paneknekan ida. Isu a nagbalinen a balay a pagtitipunan dagiti Filipino. Maysatayo met kadagiti kas ni Ms. Domingo, iti listaan iti diding ti Filcom.

Nangrugi a president ni Maggie idi 1968 ket isu pay laeng ti pannakaina dagiti opisyales ita. Ni Janice Sevilla ti mangur-urnos iti PCFH a maaramid intono Sabado, Agusto 25, 2018, alas singko iti malem a maaramid idiay Pagoda Hotel Floating Restaurant iti 1525 Rycroft St. Honolulu, HI 96814.

Kas ti nairugi a gandat ti PCFH kadagiti adun a tawen isu ti pannakapadayaw ti Parents of the Year. Angayen ti PCFH dagiti parents (nagannak) iti kada tawen tapno mapadayawanda. Da Rolly ken Josie Advincula ti Parents of the Year 2017. Ket manipud kadagiti naangay manen iti daytoy a rabii isuda manen ti mapadayawan para itoy a tawen 2018.

Naawis met dagiti nagannak nga adda pinagadalda kadagiti amin a unibersidad. Congratulations Parents ken kasta met kadagiti nagraduar a mapadayawan. Ikkan ti PCFH ti scholar ti $1,000.00 kas pammadayaw kadakuada. Tan-ok unay daytoy kadagiti nagannak.

Saan la a dayta mangpadayaw pay ti PCFH kadagiti mabigbig a bisita iti daytoy a rabii. Dagiti couples a managserbi iti komunidad ken a naayat a tumoltulong kadakuada. Adda dita da Mrs. Marina Badua ken dadduma pay a dimi mainaganan ditoy. Kablaawantayo ngarud dagiti agtuturay ita: da Ms. Maggie Domingo, Janice Sevilla ken dagiti kakaduana: ni Faye Cudal, Lina Longboy a kadua ti President Emeritus. Dagitoy nga opisyales dagiti mayordomo ti pasken intono Sabado, August 25, 2018!

...other Columns

 

____________________________________________

Home | Advertise | Subscribe | About Us | Contact Us

© 2008-2018 Hawaii Filipino Chronicle Inc.