HAWAII'S ONLY WEEKLY FILIPINO-AMERICAN NEWSPAPER
SERVING THE FILIPINO COMMUNITY SINCE 1993
OCT. 7, 2017
PHILIPPINE LANGUAGE

Dayasadas

by Pacita SALUDES

Kadagiti adun a tawen a pannakilanglangentayo kadagiti tattao iti aglawlawtayo, din mabilang a nakaammo kadagiti galad ken kababalin dagiti nakapulpulapoltayo a tattao.  Addaan ti ADAL ken awanan adal naglilimog ti lubong a paggargarawan babaknang ken napanglaw.

Dagiti addaan ti adal ti makaiparang kadagiti pagsiriban a di magaw-at dagiti awanan adal.  Ket no dadduma madlaw ti pannakatagibassitda kas ti panagrikna no dadduma dagiti napanglaw a makilanglangen kadagiti ad-daan.

Kaaduan ngamin no dadduma ti panangidasig dagiti deadal ti kinataoda a di mabalin a patasen dagiti nakurkurang ti magaw-atna.  Nupay no kasta saan met nga umdas a mangidasar ti natan-ok a kinatao ti kinangato ti adalna.  Adda ngamin tay pagsasao nga uray DEADAL no awan sursurona.

Kuna dagiti nataengan, “deadal ngem awan sursurona”.  Mapagdadasigtayo dayta.  Ngem madlawtayo uray dagiti nababa ti adalna maidasarda ti nasaysayaat pay a sursuro a maipakita.  Nadayawda ken saan a managindadakkel.

No ania kadatayo ti makadlaw ti kasasaad ken rikna dagiti makalanglangtayo madlawen dita.  Ket masapul a maawatantayo ida.

Adu ngamin dagiti kayatna ti maitantan-ok ken madaydayaw gapu mariknana a dagiti kasangsangona madlawna a dida matukod ti kabaelanna nga ilawlawag a di kabaelan ti awan adalna.

Ditan ti pakadlawan ti marikna ti kaadda ti nasayaat a sursuro tay maysa a tao.  Idasarmi ditoy ti marikna manipud kaaduan a ti makuna ngamin a deadal ket dagiti adu ti naadalna kadagiti pagadalan a pagtamtamdan dagiti saan a nakaadal, ngem awan met ti sursuro a mabalinna nga ipatulad… “ADAL ken SURSURO” nasayaat unay.  No ikutan ti maysa a tao daytoy isu ti makuna a mapagrukbaban.

No ikutan tay maysa a tao dagitoy, dua a kinabaknang isu ti makuna a mapagwadan ken mapagrukbaban.  Ad-adu ti gagayyemna ken mangdayaw kenkuana.  Deadal ken addaan ti sursuro a saan managindadakkel likliklikan dagiti nanomnomo ngem natantan-ok ti pannakilangenna ti aglawlaw.  Puera De Los Buenos.  Manmano met ketdi ti kasta nga Ilokano.  Madlawtayo met ketdi a dagiti Ilokano agpipinnategda a mangitantan-ok ti kinataoda. 

Nakiddaw daytoy a maiparikna manipud DAYASADAS ket ditay ungtan ti DUMADAYASADAS a pasaray mangpaunget, pasaray MANGPAKATAWA.  Thank you!

____________________________________________
© 2008-2017 Hawaii Filipino Chronicle Inc.