Ibilangko Daytoy Special Issue: Petpetpetak: Pingki Ken Salugsog; Allangogan Ti Barukong Ni Angkuan Deppa
by Amado I. Yoro
“Nayaw-awanak san Angkuan, “ nakunak iti bagik itay awan man la a pulos ti pagilasinak no sadino a sarpaw ti pagtitiponan dagiti kakaduak a kameng iti GUMIL Oahu. Domingo ita. Enero 29, 2023.
“Umaykanto idiay Neal Blaisdell Park, Manong, ti pagmitingan intono Domingo” kinuna ni Emelyn Damo, ti sekretaria idi inawagannak idi rabii ti Huebes.
“Wen”, kinunak. Awan ti saan no isuda ti agawag la ketdi ta napia ti bagi. “Ania kadi ti oras?” pinennekko.
“Pangaldaw nagbaetan iti alas dies, sa agtuloy iti malmalem ta adda miting.”
“Ania kadi ti napateg a damag?” sinaludsodko. Amangan kunak iti bagik nga adda napintas a follow-up dagiti immunan a nagsasaritaan ti hunta idi Agosto 2022, ti maika-26 nga anibersario, kas iti pannakaangay ti international conference, ti panagpabuya ti drama kas pamastrekan iti pondo, ti pannakabiag ti Tangguyob magasin, iti pannakaisubli a maangay ti Literary Forum ken Workshop, ken ti pannakaisagana a mailibro ti napateg a pakasaritaan ti GUMIL Oahu.
“Denggentayto ti ipadamag ni Apo Presidente” insungbatna.
Maysa ni Emelyn a kagagetan nga opisial ti GO. Dayawek ta saannak a malabsan no adda nasken a taripnong. No saan a ni Ric Agnes, co-organizer ken isu ti namber wan nga adbayser ti GO, maawaganak latta.
Ngem, ne, ditoy parke a kuna ni Emelyn, awan met ti makitak a kaduak. Saanak met pay unay a naladaw ta 10:45 pay met ti oras.Agar-arbis, ngem sinursorko dagiti tolda ken gazebo iti parke, naay, kaaduanna met dagiti adu ti karkaratay ken karkarison, daldlayday ken kupinkupin, bitibitin — adda dagiti agguuldag, -dagiti agtutugaw kitana agdudungsa — dagiti kakabsat a makuna a awanan taeng, siguro a saanda a napnek a naturog a nagpatnag.
[Agyamanka Angkuan, adda pay la nasimsimpa a pagiddaam ken pagyanam a mangan ken maturog]
“Ania ti maaramidan ti turay kadagitoy a kakabsat?” adda saludsodko iti bagik. Maysaak a volunteer organizer coordinator iti Special Projects pakairamanan iti Adopt a Hwy Clean Up, Feed the Homeless ken Adopt a Park.
MALAGIPKO ITA, daytoy a parke ti sentro ti aktibidad dagiti kaaduan a gunglo ti kadaraan — malagipko ita, namin-adu metten a nagtitinnulongan a dinaldalusan dagiti sumagmamano a grupo Filipino, pakairamanan dagiti kandidata iti Miss Oahu Filipina, Mrs. Hawaii Filipina, uggorenda ida ni Mrs. Hawaii Filipina Armi Farinas, maysa pay a kaaktibuan a padami a volunteers.
Malagipko, ti simbaan a yanko iti St. Paul’s Church nga idauluan ni Apo Randy Albano, tubo ti Bacarra, daytoy a project ket awaganmi iti ADOPT A PARK, ti Filipino Organization, dagiti nagtitipon a gunglo Filipino, pinadasmin a dinaldalusan idi, ngem no namin-ano a sinurnadak ti aplikasionko/mi tapno subliananmi koma a dalusan. Awan metten ti banag ti aplikasionko.Sabali ita ti rupa daytoy a parke. Ngem ala, Bareng no maysa manen a mairaman kadagiti parke a kitaen ti gobierno ti siudad iti nasaysayaat koma a pannakamantenir daytoy.
Sangkasao dagiti agtuturay iti estado ken siudad: kissayan ti parikut ti homeless. Ala man ngarud ta kitaek man, aramidyo ti pakakitaan. Saan la koma a kari sakbay ti eleksion.Iti panangpasiarko iti parke, mayat met ta maysa a panagpagnakon. Naulitko: nayaw-awankan san Angkuan. Nalagipko ketdi nga awagan ni Emelyn. “Yanmon Manong?” dinamagna.
“Addaak ditoy parke, awankayo met?”
“Umayka ditoy Kambingan, umaykan”
“Agtudtudo ngamin, isu a ditoytayo.”
“Ayyos, aysus umayakon”
Iti dalanko a mangsubli ti parking ti luganko, ne, adu pay ti ummong dagiti kalapati.Adda ubing a bambatayan ti amana siguro, makiay-ay-ayam ti ubing kadagiti kalapati a kurkurwayanna iti makan.
Iti sirok iti akasia, wenno algarroba, Ne, daytan, ay, naay, adda met tumartarektek a kalapati iti padana a kalapati. Pagammuan simmalpa. Ne, libre pabuya!
Ditoy kambingan, awagak: balik sa dating pugad, ditoy ti nakabuangayan ti GUMIL Oahu idi Agosto 13, 1996. Dita bangir a dining room–31 a co-organizers ti nagtitipon dita ta sinangailida da Appo Dionisio Bulong ken Reynaldo Duque, agpada nga Editor, Bannawag ken ni Apo Bulong, Liwayway ken ni Apo Duque.
Siak san ti naudi. “Komustakayo, Appo ken kakabsat”, impasungadko.
Adda nagkuna: kaska la talaga a senior citizen, dumadaan, lumaglagto.
Kasta ti awan kasarsaritana, kasta ti agpagna iti inaldaw.Intudo ni Emelyn ti attendance notebook, siak ti kaudian ti listaan.
Nagtugawak iti ungto ti lamisaan. Kinaabayko ni Eddie Villegas a kailiak, i-Sinait. Taga Sallacapo idinto a Tapaoak.
[Adu ti pukpuklo idiay ilimi a Sinait, maawagan pay iti Garlic Center of the North. Sinnait. Laban-laban.]
Pinasiar dagiti managsiput ken managpaliiw a matak,[ in the eyes of a mannurot;] kaaduan ti am-ammok, nupay adda 3 wenno 5 a kasla barbaro a rupa.
Iti kanawanko, adda tallo nga Eddie. ni Eddie Villegas, [Sinait- Yor] ni Eddie Agpalza [Vintaren- Siwawwer], ni Eddie Bueno, [San Nicolas-Banga—aglako ti daga awan titulona] Ric Agnes [Sarrat-Ritritemon Kayong] ni Rizal Fernandez, [Badoc-Luna town] Mila Fernandez, Emelyn Damo, Gladys Menor.
Baro a rupa-baro a kameng Mori sen Antonio Tagama, Virgie Farinas, Divina Menor, Nena Bueno, Myrna Villegas, Fely Fayloga, Melinda Gambol, Lina Domingo,Marylou Solamillos, siak.
Ne, simrek ni Marivic Dumlao.
Narugian ti miting. Panglukat a kararag ni Melinda Gambol, English, ken Gladys Menor, Ilokano.YAM-AMMONA BAGBAGINA: Pasubli a rikus, clockwise ken nairugi ken ni Marylou Solamillos.Nagrikus ti self-introduction — nadakamat dagiti balikas a daan, kadaanan, tagingting ken antigo, nailet ken nalawwa, atiddog kken ababa, adda pay nagkuna, balo-akon, [baroak manen] adda pay nagkuna, agkabaw a kabalio ngem napigsa ti kugtar ti kamaudi.
Iti dagupmi ita nga aldaw–Adda tallo nga adigi [co-founder] ti GUMIL Oahu dakami kada Ric Agnes ken Gladys Menor ti naaddaan ti gundaway nga adda ita a miting, kadagiti 31 nga orihinal a co-organizers.
Napnuan ti imas ti kaan iti pangaldaw kadagiti naorder a makan ditoy Kambingan, basta Kambingan, naimas. Pinapaitan, sangkutsar, pancit, dinardaraan, naimas a dinengdeng a karabasa, utong, okra a nasagpawan iti pasayan.
Immatiddog ti tabas ti turon, idinto a nagtimbukel met ti katsaron. Kuna ni Lina D: alaem ti dua a sangaparis a katsuron, mangala ti maysa a turon. Dayta ti naal-alam, Angkuan. Paset ti agenda, pannakainominar ken mabotosan dagiti agtakem kadagiti puesto a nabakantean; panagpabuya ti drama; maangay a GUMIL International Conference ken sadino ti venue, ken panangawis kadagiti sigud, ken kabarbaro a kameng.
Napagtutulagan pay ti pannakaangay iti binulan a miting, potluck iti tunggal alas singko iti malem, maikatlo a Domingo.
Naikkankami ti gundaway a namagsapata kadagiti dua nga opisiales, da Marylou Solamillos, external vice president; Gladys Menor recording secretary.Ken dagiti tallo a baro a kameng: Melinda Gambol, Mori-sen Antonio Tagama ken Fely Fayloga.
“The power and authority vested upon me [ as a founding president/director], you are now officially and duly officers and members of GUMIL Oahu. Welcome! Congratulations!
Kastoy ti insingaymi a kapampanunotan ken singasing iti pannakaitultuloy latta ti panagsurat. Napateg ti bukod a pagsasao. No saan a panagsurat, ti nasken unay iti panagkakadua, iti panangited ti panawen, ti talento, ken karaman ti kuarta kas paset ti responsibilidad ti maysa a napudno, napasnek a kameng—-panagkakadua a panagdur-as ken panagrang-ay ti Literatura ken Kultura Ilokana, kas tema wenno motto ti GUMIL Oahu.
No nabunga man ti napalpalabas a liderato a simmaruno kaniak, da Gladys Menor, Rafael Alimbuyugen, Rizal Fernandez, ken Silvino JUN Bermisa, ken ni agdama a presidente Eddie Bueno, gapu iti nasimbeng a panagtutunnos ken panagtitinnulong, agyaman ken agsaludoak ket iti koma panagtitipon ti adu a barbaro a kapanunotan ken iti saan a pananglipat iti bassit a nangrugian, kas iti pannakaiula ti bukel, nagtubo, nagbiag ken sisbibiag, nabungbunga koma pay, kas nadakamatko iti in my presidential exit as an outgoing president idi Nobiembre 2001:
“hoping that following administration is to continue, maintain and improve, bring new ideas, new programs OR TO EXCEL …….what we all started in collective and collaborative efforts…. I trust that GO is in good hands.”
Nadakamatmi a maysa iti TOP 5 ti GUMIL Oahu, maikadua, ta umuna kaniak ti Annak Ti Sinait ken Alumni, a kaaktibuan kadagiti aganay a 18 a guuglo iti Hawaii a nakairamramananmi a nangbangon, nakipagbangon, no proyekto, ditoy ken idiay Filipinas iti pagsasaritaan.
Indalanmi ti pangrikep a panagyaman babaen iti kararag.
SALUDO KADAKUADA A SANGAPADA
Original co-organizers ti GUMIL Oahu
- Felipe Abinsay, Jr.
- Ric Agnes
- Romualdo Agustin
- Namnama Baptista
- Carayo Caoile
- David Cordero
- Philip Blanco
- Maggie Domingo
- Larry Fiesta
- Jerry Ilar
- Mona Ilar
- Joe Lazo
- Arsenio Macadangdang
- Marlene Manzano+
- Ben Mendoza
- Gladys Mendoza
- Gladys Menor
- Letty Pascua
- Fred Quibol
- Vic Rayo
- Evelyn Rojo
- Gerry Rojo
- Rina Sagayadoro
- Tony Sagayadoro+
- Elvie Tagayuna
- Estrella Taong
- Paul Taong
- Mike Ulibas+
- Helen Ulibas
- Amado Yoro
- Elias Yoro+
UMUNA A CONSTITUTION & BYLAWS INTRABAHO DA
- Ric Agnes, pangulo
- Amado Yoro, kameng
- Mike Ulibas, kameng
- Gladys Menor, kameng
Ket ni Ric Agnes ti kangrunaan a nangserrek iti panagkameng ti GO iti GUMIL Filipinas, ni Amado Yoro ti nangirehistro iti Internal Revenue Services, Department of Treasury ken iti Department of Commerce and Consumer Affairs [DCCA], State of Hawaii Regulatory Agency.
UMUNA LITERARY FORUM/WORKSHOP
Agosto 19, 1996
Manager’s Mansion Renton Road
Ewa Villages
Umuna a Literary Forum Seminar/Workshop Chairman ni Francisco Ponce. Kangrunaan a sangaili ken nagsarita da Dionisio Bulong ken Reynaldo Duque iti Bannawag ken Liwayway.
Babaen iti adu a seminar ken forum, ken iti anep ken regta dagiti dadduma a kameng, nakapagsuratda, ken naaddaanda iti gundaway a nakagun-od iti napateg a pammadayaw iti tay-ak ken salip iti panagsuratan.
