Melody Yadao Santiago: Mega Star Of Ilocandia; Pride Of Sinait
by Amado I. Yoro
ANIA TI NAGAN A Melody. Balikas a Greigo “meloidia” singing and chanting. Naalumamay nga ayug ti kansion, addaan rima, addaan rikna pitik ken pulso.
“Asino ti nangpili ti naganmo a Melody?” dinamagko.
“Saanko ammo” insungbatna.
“Diak nadendennaan dagiti nagannak kaniak,” impudno ni Melody.
Ulilan iti ina ken ama da Reynaldo Santiago ken Carmelita Yadao.
Ni Lola Carlina Yadao Lipaen a nanang ni Carmelita ti nagyananna kabayatan a nagubing ken dimmakkel idaiy Dadalaquiten Norte, Sinait, Ilocos Sur.
Simrek ni Melody iti elementaria iti Dadalaquiten Elementary School.
Nagtuloy iti sekundaria iti Sinait National High School, Sinait, Ilocos Sur kalpasanna iti Northwestern University.
Nupay nayanak idiay San Juan Rizal idi Marso 1974, kada Reynaldo Santiago ken Carmelita Yadao, ibilangna ti Dadalaquiten Norte a lugarna, ta isu ti puon dagiti appona a tumeng da Miguel Yadao ken Ernesta Arrocena iti Dadalaquiten Norte.
Maibilang ti Dadalaquiten Norte kadagiti kapintasan a barangay iti Sinait. Ni Punong Barangay Roselily Dayoan ti agdama a kapitana. Sakupen ti Dadalaquiten Norte ti agdindinamag a Lugo Beach, maysa kadagiti kasayaatan, kadalusan ken katalnaan a playa iti Region 1. Inub-ubonen dagiti balligi ken pammadayaw a naited iti Dadalaquiten Norte, no saan man a kasiglatan a barangay iti rehion, maysa kadagiti kasiglatan iti probinsia ti Ilocos Sur babaen iti pangidaulo ni Kapitana Roselily. Addaan kadagiti atraksion ti turista, kangrunaan unay ti MEGA floating cottate, dagiti agtatapaw a balaybalay. Kaayatan a sarungkaran dagiti turista nga aggapu kadagiti sasbali a lugar iti pagilian ken dagiti aggapu iti ballasiw ti taaw.
“A great performer and singer,” kinuna ni Punong Barangay Roselily Dayoan a kalugaranna maipapan ken ni Melody. “Agpadakami a Yadao”, insilpona.
Adda ti historical ken relihion a pakasaritaan ti Black Nazarene, Pugot a Nazareno wenno Apo Lakay wenno Sto Cristo Milagroso ta ditoy a lugar a naidaknir ti imahen da Virgin Mary ken Sto. Cristo idi tawen 1620 manipud iti pagilian a Nagasaki, Japan idi Tokunaga regime. Ditoy met a naipatakder ti STO CRISTO MILAGROSO MARKER a nagbuligan a proyekto ti dua a gunglo dagiti taga Sinait iti Hawaii: Annak Ti inait Iti Hawaii ken Sinait National High School Alumni Association of Hawaii, ken dagiti naayat a kameng iti komunidad. Donasion ti Iloreta Family ti lote a nakaipatakderan ti nasao a marker.
“Ania kadi ti nakaigapu a nainspiraranka nga agkanta?” dinamagmi.
“Adda. Gapu laeng iti kinapobre ti pamiliami, ken maysaak nga ulila.”
NANGRUGI nagkanta idi adda iti elementaria.
“Nangrugi idi 90’s rinugiakon ti nakisalsalip iti kinnantaan”.
Adu a salip ti kinnantaan ti nakisalsalipanna kadagiti pasalip iti radio iti probinsia ti Ilocos Norte ken nagun-odna iti kina champion.
ADDAN AGANAY A 100 A KANTANA nga inrekord ti nadumaduma a recording company kas met iti nadumaduma a padana a kumakanta iti ilokano.
NAGBALIN A RECORDING ARTIST iti Alpha records ken Mr. Harry Corpus bukros a bukangkang iti kinagagetna a makipartisipar iti programa NAAWAGAN A KAS MEGA STAR OF ILOCANDIA.
IMMUNA A RECORDINGNA TI “Diak Gamden Ti Agayat” a nanglukat ti lubongna iti tay-ak ti musika ken kinnantaan.
“Daytoy a kantak ti nakaam-ammuanda iti numo ti biang” kinuna ni Melo.Sabali pay a kantana ti “Annadam ti Agayat”
“Malaglagipka Laeng”
“Gayam ni Ayat”
“An-anusak”
“Inayonko pay ti maysa a kantak manipud iti Lucky 7 Hawaii Production babaen kada Carlos Pucan, Jr. ken Ninang Pat Pucan” insilpona.
DADDUMA PAY A KANTANA
1. An annuek ti guapo
2. Lulua
3. Parparmata
4. Umisem kumatawa
5. Komustaka
ITI Aquarius record
“RIMAT DAGITI BITUEN”
Nairaman
1. Dita Dennam Awan Nagbasolak
2. Palubosannak Kadin
3. Abalayan
“ADDA pay dagiti sumaruno nga irecordko iti masakbayan,” natalged a nagkuna ni Melody.
Napagasatan nga immay ditoy America idi 2018 kas imigrante babaen iti nagasat ken naayat nga asawana ket napagasatan nga agtrabaho a porter ken caregiver idiay Santa Maria, California.
Adda regular a programana a mangeg ken mabuya iti internet iti agdama ti MELO YADAO SANTIAGO LUCKY 7 HAWAII LIVE STREAM Santa Maria, California base. Dayaw ti Sinait ni Melody kas maysa a Mega Champion iti lubong ti musika ken kinnantaan.
