Ditoy Pikkan Brook Iti Agmatuon

by Amada Yoro

Naamo man a sirnaat ti init iti agtindek
Ita, adtoyak iti sidong ti daan
a Pikkan Brook
Ti sibibiag a danum iti urat ti daga
Iti berde a kabakiran iti laud iti tinaleb ken
Pinan-aw nga abong-abong iti away
Pasaray agampayag dagiti kannaway
Kalumlumba dagiti tuwato, umarikiak
Dagiti panal, pagaw ken berdugo
Dagiti salaksak kasda la nabugtak
A nakadamag iti naranga a padaya iti punsionan
ni Apo Balikbalay
Iti maidasar iti dulang ken lamisaan
dagiti nangurongor ken napadara
kalding, baka, 
baboy ken ni saran
Agkatok met ni kakok, uray la a
gumanukgok, saan met a paudi
Dagiti singin a gikgik iti rawis nalayog a kawayan
Dagiti kalipkip
Nadam-eg latta dagiti sinilong
A naggapasan dagiti miracle rice, gallano
Awanen daydi duog ken dakkel a bittaog
Awanen ti bassit a bangkirig
A pagbunubonan iti bukel ni tabako Virginia 
Kinumotanen ti berde a kaykayo
Kasda man tumukno iti langit
Iti narayray nga init iti agmatuon.
Daydi bayawas awanen a manglinong
Iti bubon ti ubbog, a pakalaglagipan ni Ama Tosong
[ne, kitaem ita, naugotan met ti bolpenko
A mangyurit koma kadagiti balikas
Kas iti bubon…….b-u-b-o-n, dagiti lagip]
Imbag laengen ta adda latta nayon iti sabikel
Agbatikan bolpen a natikagan
Adda baresbes dadduma a kinelleng
Inggawidnak dagiti lanlanut iti pagnaak
Ditoy dagiti similia
Ditoy dagiti palakay
Ditoy dagiti panagsibog
Bigat ken malem.
Rotasion ti biag dagiti padak a mannalon
Dagiti agriing iti apagsipasip
Ken ileleggak iti patinayon a namnama
Agbiagka iti ling-et; agbiagka
Iti agawa ken ibtur
Dagiti adu a pannakigasanggasat
Ta lamolamotayo a simmangbay
Iti naidagaan a biag ket sika, siak
Met laeng ken iti pannakigasanggasat
Ti mangtubay ken mangsapul iti kaipapanan.
Itoy nga agmatuon, ti panagtindek ti init
Ditoy a katengngaan ti biag
Dagiti inulim a bantay iti panagsang-at
Ita, urayem ti panagligsay
Umay ti panaglikig ti init
A mangin-inut a mangitunda iti
uman-anem-em a malem
Dagiti panagsalog: iti man pigsa
Iti man ibtur, uray iti panunot, iti lagip
No dadduma a mangisubli ti Kalman
Dagiti naasakanen a napalabas
A dinapadap dagiti kuggangi ken sidingan a dapan
Dagiti kabingkolan ti biag
Napateg daytoy nga isasarungkar
Iti nakaindayonan a lugar
Ti dagidagi dagiti nagduayyaan
kas iti anak dagiti pimmanaw
Iti kunada a point of no return
Daytoy ti panagtindek maibati ti ladawan
dagiti baresbes ken bakir iti sabali nga isasarungkar.
iti awan patinggana a segga iti naunday
a panagbaniaga ken panagbirok iti kaibatogan.
Naisuratko daytoy idi nagbakasionak idi Oktubre-Nobiembre 2012 idiay Tapao a nakayanakak

About Author

admin

See author's posts