Ti Lagip Agtalinaed A Lagip Kas Iti Kinapateg Ti Gayyyem

by Amado Yoro

SUBLIAK TI NAPALABAS, kas taldiap ken panagsubli kadagiti napateg a pagteng ken pasamak iti biag.

NAPANAWAK TI HAWAII, Mayo 2023,  iti adu a napateg ken nakalalagip a banag, pakairamanan kadagiti gunglo a nakipabangonak, nakipagserbiak, nasinged a gagayyem ken pada a community volunteers.

KADAGUPAN dagiti immuna a community leaders iti Hawaii a kaunaan a naam-ammok, nakapulapolko kangrunaanna iti Honolulu, kas  GUMIL Hawaii, umuna unay a grupo a nagkamengak kas mannurat.

Inkakaubingak ti agduyos ken agayat iti panagsuratan kas iti umuna nga ayatko.

Nangrugi amin idiay Tapao a nakayanakak. Maysaak a mannalon ken anak iti baybay kas iti panagkalap.

Naayatak iti tagtagnawa.  Innamoyo. Tinnulong. Paset ti biagko ti Gunglo dagiti mannurat nga Ilokano pakairamanan ti Sta Cruz Writers Guild, 1962; Sinait Writers Association,  1962-1963; GUMIL Sinait, 1963-1971; GUMIL Ilocos Sur, 1964- 1971;  GUMIL Filipinas, 1968-1971. Natural kaniak a nagkamengak a dagus iti GUMIL Hawaii apaman a simmangpetak  idi 1971, babaen iti awis ni Mrs. Pacita Cabulera Saludes, founding president.

KAS maibilang a lider iti komunidad  a naam-ammmok kadagiti nangrugi iti 1971 da Mrs. Pacita Saludes, Felipe Madarang, Graciano Soriano, Clemente Duclayan, Rev Juan Dahiilig, Ambassador Ben Domingo, Rev Matias Miguel, Mario Orbito, Roland Bueno. Pete   Ramos, Ric Labez, Mario Albalos, Jun Abinsay, Leo Blanco, Francisco Ponce, David Paco, Dip. Emilio Alcon a nagkuna: patibkerentayo ti Gumil tapno saan nga agbalin nga “umel”.

Paset ti pannakatubay ti biagko iti direct involvementko iti community volunteer activities iti Lions Club International, Knights of Rizal, Leeward Lions  Club, Honolulu Fil-Am Lions Club, ken dadduma pay.   

SABALI laeng met  dagiti nakapulpolapolko kadagiti simmaruno a tawen Kas kada Marlene Manzano, Danny Villaruz,  Faustino Respicio,  Flor Martinez, Larry Ordonez, Mel Gonzales, Art Abinsay, Mel Europa, Bert Ugalino, Leon Dagdagan, Rev. Canon Randolph N Albano ken dadduma pay.

ITOY a gundaway, ni Mario Orbito, kas maysa kadagiti kasingedan a gayyem iti biagko ti sagidek iti kinasiasinona, iti bukodko a padas. Isu ti maysa kadagiti kaunaan a community leader a naam-ammok idi kasangsangpetko iti Hawaii idi Hulio 1971.

Maysa ni Mario a kaduak iti Gumil Hawaii, Oahu Filipino Community Council, United Filipino Council of Hawaii, Tri Media Council, Santak, Ilokandia Magasin, Pluma Magasin, Hawaii Filipino News a nagkakaduaanmi kada Ambassador Juan C. Dionisio, Sr.; Cartoonist Corky Trinidad,  Pepi Nieva. Cisco Ugale, Co-Founder/Sponsor ni Mario iti AMMAFLA Literary Contest, co-organizer iti Ilocos Sur International Association and Foundation [ISIF].

Kas Fine Arts graduate iti University of Santo Tomas, maysa a graphic artist ni Mario ket nagkaduakami iti printing, ti Ilokandia Magasin, ken isu ti kangrunaan nga agaramiid iti souvenir book dagiti nadumaduma nga organisasion, ket isu ti kaduami iti Bayengyeng [Bamboo Jug] ken Ayamuom [Scent] two anthology books of Ilokano poems and short stories by the Six en Honolulu: Dr. Aurelio Solver Agcaoili, Romulo Basuel, Arnold Jose, Francisco Ponce, Corazon Quiamas, Amado Yoro, and layout artist Myra Yoro.

KINUNA NI MARIO a daytoy  Abril 5 aginggana iti 25 mairaman dagiti gapuananna iti maangay a 96^th annual art exhbit iti Honolulu Printmakers Downtown Art Center. Kasta pay nga adda booth ni Mario iti maangay nga Art Festival iti Nuuanu Avenue—mairaman dagiti napateg ken orihinal a collections nga art work ni nalatak a Filipino cartoonist Corky Trinidad.

Kas panagtultuloy daytoy a panagkallautang, agtalinaedak a simpli, ken mangbigbig ti naggapuak a Hawaii a nangbukel ti paset ti pakasaritaak iti aganay a 52 a Hulio, ken ti nakayanakak a Tapao, Sinait, Ilocos Sur.  Ket ituloyko nga isurat ti pudno a pitik, ti pulso, ti rikna ken ladawan ti komunidad a yanko ita, iti kabaelan a gaw-aten dagiti lima a sentidok.

AGBATI ken agtalinaed  ti sibibiag a lagip kas paset tti biag ken pakasaritaan.

Sipapakurangak nga agyaman iti Hawaii Filipino Chronicle iti gundaway a maituloyko ti  agsurat.

About Author

admin

See author's posts