Karit Iti Pluma Ni Ilokano Part 1

by Amado I. Yoro

Tallopulo ket maysa a tawen itan, Pebrero 2023 ita a sursuratek, ngem kasla idi kalman laeng. Kasta ti kinapateg ti maysa a padas a saan a malipatan, dagiti kinaimbag kas nailaga ti pannakatubay ti biag ti maysa a tao.

Laglagip ken panagbiag ti napalabas.

Kas mannurat, napateg kaniak.

“Sumrekka, Ading!” Naipasabat kaniak daytoy apaman a nakasangpetak iti pakaangayan ti tinawen a Literary Seminar Workshop babaen ti GUMIL Hawaii.Ti GUMIL Hawaii ti immuna a gunglo ti mannurat nga Ilokano ditoy. Nabangon idi Enero 1971 babaen iti nagaget a presidente Mrs. Pacita Saludes. Ti GUMIL Hawaii ti immuna a grupo a nakamengak apaman a nakasangpetak ditoy Hawaii idi Hulio 1971.

Madama ni Mike Ulibas nga agsarsarita maipapan iti Newsriting idi sumangpetak iti Susannah Wesley Community Center a pakaangayan ti agtinawen a panaggiinnadal iti panagsuratan. Setiembre 5,1992.

Kaduak ni Mike iti Bannawag Hawaii Bureau. Adda pay kolumna iti Pacific Journal “Makseten. Makseten”.

Uray no nagtrabahuak ita nga agsapa, inkagumaak ti dumar-ay uray dandani tengnga ti aldaw, ken dandanin iti pannangan. Napateg ti awis kaniak gapu iti kinapateg kaniak iti panagsuratan ta no wen ken mabalin, kayatko ti makiinnadal.

“Tapno mataginayon ti kultura ken ti pagsasaotayo nga Ilokano babaen iti panagsuratan.”

Napasungadannak ni Letty Pasuca, ina ni Maria Lina Pascua a Miss GUMIL Hawaii 1982.

Sa nagdinnakulapkami ken ni Mel Agag, Jr. Apagisu met ni Mrs. Cresencia Dela Rosa Domingo a nagkuna kaniak: “Mamultaka ta naladawka, Amado.”

“Areglado Boss, itedko ti natrabahuak ita a bigat,” inkatawak.

“Sumrekkan, Ading. Nasayaat man ta maisaparmo”, impasabat kaniak ni Mrs. Pacita Saludes a presidente ti GUMIL Hawaii.

Very catchy ti mensahe iti Registration desk nga imatonnan ni Jocelyn Agustin. Adda pagrehistruan, ken no mano ti bayadan a panagkameng.

Iti diding, ngatuen ti headtable, nakabitin ken naibaskag ti banner: Welcome: Annual Literary Seminar Workshop. Tema: Family of Ilokano Writers Learning Together.

Pinilik ti nabakante a tugaw a kasinnango ti headtable. Tugaw gayam ni Mel Agag, Jr. ti adda iti abayko. Naggapu ni Mel idiay Hilo, agtrabaho iti University of Hawaii- Hilo, kas Information Officer. Isu idi ti Associate Editor iti Ilokandia Magasin, siak ti Editor-in-Chief [1977-1982].

Iti kaabayko iti kanawan ti tugaw ni Rev. David Saludez, regular a contributor iti Ilokandia Magasin. Isu ti maysa kadagiti resource speaker iti GH Literary Workshop kadagiti napalabas a tawen a nagpaayak met a Chirman ti LFSW. Agsarita ni Rev. Saludez maipapan iti importansia nga akem ni Mannurat.

“Dakayo gayam ni Amado Yoro!” Napataliawak.”Naggasaten ta makitakayo.”

“Wen, siak toy agserbi” inyawatko ti imak.”

“Siak ni Magdalena Nacino, tay masansan nga umawag iti programam iti radio.”

“Thank you Misis,” mapadayaanak a makitakayo iti personal. Ti GUMIL Hawaii ti pagyamananyo ta ditoytayo nga aggaammo.

Adda programak iti KNDI Radio iti tunggal Domingo, ti AMADO YORO AT YOUR SERVICE.

Sekreto ken Akem ni Mannurat ni Rev. David Saludez.

AYAT.

“Ayat ti maysa a sekreto ti naballigian iti panagsuratan,” panangirugi ni Rev. David Saludez. Kunana a mangrugi ti amin a balligi gapu iti Ayat.  

Masapul nga adda ayatmo: Nasken nga ayaten ti bukod a pagsasao; ayaten ti kultura a nagtaudan; ayaten ti disso,lugar wenno ayan a pagsuratan.

Nasken ti PANGGEP, ti kayat nga aramiden,ken itungpal; Nasken ti KONSENSIA, ti rikna, saem,  panangipakita ti pudno a mapaspasamak.

Nasken ti KINAPUDNO, iti aramid, iti panggep, iti pagsasao.

Adda napateg nga akem ti mannurat iti panagdur-as ken irarang-ay ti literatura tapno saan a mabati nga awanan panaggaraw ken panagdur-as.

Nasken nga addakonsensia ti mannurat. “Good writer must be a good moral person. Nagsarita ni Cresencia Dela Rosa Domingo maipapan iti daniw.

“Nariknamon, ikur-itmon, daniwen—masapul nga ipeksam ti riknam. Uray ania nga estilo. Ritmo, metro, rima, nota, musika, blank verse. Free verse iti kaalistuan a suratenna a daniw.”

Benny Ventura—nagsarita iti drama iti radio. Nabaknang ti padasna iti radio kas musical director,iti NBC-DWRI ken BBC-DWLW, Laoag. Maysa a replay ti “Wedding Ring” a sinurat ni dati Aida Aurelio nga asawana. Ditoy Hawaii, ni Benny ti ad-adda a   maawagan iti “Canuto” kadagiti promotional advertisements iti radio.

Nagsarita ni Ric Agnes maipapan kadagiti pakisalip a sinurat.

“Ad-adu koma ti maapit kas napintas nga ibunga panaggiinnadal, literary forum ken workshop,” Mannurat iti Bannawag ni Ric.

Francisco Ponce— “Ikkan ti nabileg a pilosopia ti biag, ken siguraduen a makaited iti moral lesson dagiti suraten a sarita”. Premiado a mannurat ni Ponce.

Ines Cayaban-otograpia.

Immay ti pangaldaw.