Pamaskua Ti Gumil Hawaii Ken Ti Pondador

by Amado I. Yoro

“Umayka nga umay, Manong,” impagedged ni Jocelyn Agustin, sekretaria ti GUMIL Hawaii. Nagranakami iti dakkel nga inaugurasion ni Hawaii Governor Josh Green idi Disiembre 5, 2022 iti Neal Blaisdell Center Arena.

Ket nakipagpaskuaak met iti pondador ti  GUMIL Hawaii Mrs. Pacita Saludes ken kakaduana ita nga aldaw ti Domingo, Disiembre 11, 2022 ditoy Max Manila, Waipahu.Agyamanak iti panangted ni Mr. Abraham Flores, umuna a bise presidente iti panagsaritak.

Inrugik: “Agyamanak,kakabsatko iti pluma. Together again. Wen, kastoy a naam-ammok ni Mrs. Pacita Saludes. Awagko kenkuana ket Manang Pacing.”

Taldiap/Subli
1964 idi isu ti nagpaay a maysa kadagiti resource speakers iti  GUMIL Sinait, a maysaak idi a gumugumil kas opisial iti Gumil Sinait, dati a Sinait Writers’ Association. Maibilang nga anak ti Sinait ni Manang Pacing ta naikamang iti taga Ubbog, Sinait isu ni Manong Alfredo Saludes. Ni Manang Pacing ti pondador ken presidente ti GUMIL Abra kadagidi a tawen dekada 60’s.

Idi mabangon ti GUMIL Filipinas idi 1967-wenno 1968,  Isu ti maysa kadagiti umuna a Business Managers ket nagsapatada iti seremonia a naangay idiay Baguio City ket ni Presidente Ferdinand E. Marcos ti nagpaay a naisangayan a sangaili. Ni Mayor Arturo [Malutluto, Maib-ibus] Padua iti Sison Pangasinan ti umuna a nagpresidente iti GUMIL Filipinas.

Ket idi naangay ti GUMIL Filipinas National Conference idiay Donia Gregoria Rivera Quirino Memorial, Vigan City, Delagado idi ti GUMIL Abra, idinto a delegadoak iti GUMIL Ilocos Sur.

ITI Hawaii
IDI AGOSTO 3, 1971,  iti maysa a malem ditoy Hawaii, naisagatak a nakasarita ni Manang Pacing iti telepono. Sangsangpetko a naggapu iti Filipinas, Hulio 30,  iti umuna a gundaway. “Welcome to Hawaii, Amado. Mannuratka met, awisenka a tumipon iti GUMIL Hawaii.”

IBILANGKO ti GUMIL Hawaii nga umuna a gunglo dagiti mannurat iti Hawaii a nangpasangbay  kaniak iti Hawaii.

Ket daytan ti nangrugian ti nasingsinged a panagkakaduami kada Manang Pacing iti komunidad maipangpangruna iti GUMIL Hawaii.

Agosto 1971, kas managduyos iti daniw, nagdaniwak maipaay iti Her Majesty Queen Lina Saludes iti Our Lady of the Mount.

Labor Day iti Setiembre 1971, maysaak kadagiti nagsarita iti GUMIL Hawaii Literary Seminar and Workshop.

Nabotosanak a sarhento de armas, sa bise presidente. Nagpaayak a chairman iti nadumaduma a komite.

Aktibokami iti panagsuratan iti sarita, drama, bukanegan.

Agdama a siak ti presidente ti Oahu Filipino Community Council ngem kas Co-Chairman ti Miss GUMIL Hawaii Search Committee, idi Mayo-Hunio 1982, kimmuyogkami iti Miss GUMIL Hawaii Maria Lina Pascua a nagbakasion idiay Filipinas. Sinangaili ti Bannawag ken ti Department of Tourism, Manila, ti grupo nga impanguluan ni Mrs. Saludes.

Sinangailinakami ti Ilocos Sur Agricultural College ken ni Mayor Brillantes iti Santa Maria Ilocos Sur.

Sinangailinakami ti GUMIL Abra ket maysakami a nagsarita iti panagsuratan iti daniw.Sinangailikami ti GUMIL Sinait ken ti Sinait Municipal officials nga ipanguluan ni Mayor George Cabacungan.

Sinangailinakami ti GUMIL Ilocos Norte nga ipanguluan ni Mr. Jaime Lucas, nagdirektor iti Department of Trade.

Kaduak a nangbangon iti Ilokandia Magasin 1976-1982. Isu ti immuna nga Editor-in-Chief, simmublatak idi nagbalin nga Advertising Manager.

Kaduami a nangbangon ti Ilocos Surian Association of Hawaii, 1977. Isu ti maysa kadagiti bise presidente, siak ti umuna nga auditor.

Idi 1977 1982, kaduami iti Oahu Filipino Community Council [OFCC] kaaduan nga opisial ti GUMIL Hawai ti nagopisial iti OFCC, Mario Albalos, Amado Yoro, Pacita Saludes,Felipe Abinsay, Jr. Mel Gonzales, Mario Orbito, Loduvico Tugadi. Immuna a nagpresidente ni Mario Albalos, sa simmarunoak, nagsekretaria ni Mrs. Saludes, tesorero ni Jun Abinsay, sa nagpresidente, auditor ni Ludi Tugadi, Mel Gonzales, direktor, Mario Orbito, bise presidente.

Kaduami iti Editorial Board iti GUMIL Hawaii anthologies Amado Yoro, Pacita Saludes, Mario Albalos, Francisco Ponce, Felipe Abinsayy, Jr., Rev. Juan Dahilig, Mairaman ti Bin-I, Dawa, Agtangkayagen ti GUMIL, Umuna a Dekada ti GH, kdpy.

Kaduak pay iti Hawaii Filipino News, Santak.Pacific Journal.Hawaii Filipino Chronicle.

ITI PANANGDAWAT ni GUMIL Hawaii vice president Abraham Flores, Jr. kaniak iti nanumo a kapanunotak no ania ti/dagiti mabalin a maitipon iti programa ti GH iti maisagsagana a pannakaselebrar ti maika-52 a tawen ken foundation day a maangay intono Enero 2023, ken tapno maisubli ken mapagbalin “MANEN” nga aktibo ti GH: “mabiag koma ti panagsuratan, ti drama, ti seminar workshop tapno aggiinnadal dagiti addaan iti essem, panagduyos nga agsurat, masapul nga.

AGSURATTAYO, biagen, tagibenen, ituloy a pabaknangen ti Literatura Ilokana, masapul nga adda dagiti agbalin a mannurat iti agdama ken baro a henerasion, daytoy ti maysa a wagas a panangtaliaw ti naggapuantayo a kataltalonan, iti   away, ili a nakayanakan a daga ken nagtaudan ti ramut a nasken nga ipateg ken salimetmetan. Ken panagilibro, ken ti community volunteer work kas iti feed the homeless, adopt a park, adopt a hwy, kdpy.”

Naragsak ti paskua ta adda pay binungon. Adda dagiti sigud nga am-ammok pakaibilangan da Emmie Anderson, KPRP, Lilia Del Rosario, Albina Gamponia, Lydia Ramiro, Lina Feliciano, Lerina Saludes, umuna a Miss GUMIL Hawaii, kdpy.

Naikkanak ti gundaway a nangisagut ti dua a libro iti Da Six en Honolulu: Bayengyeng ken Ayamuom. Iti dedikasionko kada Manang Pacing ken Jocelyn, pondador ken sekretaria: Dagitoy ti bunga dagiti arapaap, dagiti seminar/workshop ken panaggiinnadal, bunga ti pluma ken panagkakadua iti nagan ti Literatura: Naimbag a panangbasayo—AmadoBIAGEN TI BUKOD A PAGSASAO NGA ILOKANO, agsurattayo iti nagan ti Literatura Ilokana.


Leave a Reply

Your email address will not be published.

This site uses Akismet to reduce spam. Learn how your comment data is processed.