Manamnama Iti Nabungbunga Koma nga Adminsitrasion Ni Apo Gobernador Josh Green

by Amado I. Yoro

Baro a panagrugi [new beginning] ti bugas ti mensahe niGobernador Josh Green iti panagsaritana kas baro a gobernador. Ditoy Neal Blaisdell Center Arena ti nakaangayan ti inagurasionna idi Disiembre 5, 2022, ket maysakami met kadagiti naawis babaen iti napateg a pagayam iti komunidad.

Parbangon pay laeng iti Lunes Disiembre 5, 2022, nakarubuatakon a mapan iti pagurayan iti BUS a luganko a mapan mangbuya ti inaugurasion ti baro a gobernador iti Estado Iti Hawaii Dr. Josh Green. Naangay ti nasao nga inaugurasion iti Neal Blaisdell Center Arena, Honolulu, Hawaii.

Kas nagtutulaganmi kada dati a representante Felipe Palma Abinsay, Jr., Jean Jeremiah, urayek ida iti nagsulian ti South St. ken Kapiolani Blvd, sanguanan iti Honolulu City Hall tapno agkukuyogkami a sumrek iti uneg. Pasado presidentekami a tallo iti Oahu Filipino Community Council. Limakami koma nga agkukuyog ita kas mairaman iti VIP nga imbitasion ken ni Jean ngem awan da Danny Villaruz ken Ben Cabreros ta adda nairana a napananda.

Dakami a lima ita ti opisial ti kabangbangon a grupo a managan iti Ilocos Sur International Association and Foundation.

Mainaig daytoy a grupo iti maisagsagana nga Ilocos Sur International Reunion and Homecoming intono Pebrero 2024 kas pannakaselebrar iti maika-206 nga anibersario ti probinsia ti Ilocos Sur a maangayto iti Vigan City, ken babaen iti panangsangaili ti gobierno ti siudad nga idauluan ni Mayor Jose Bonito Singson, ken gobierno iti probinsia nga idauluan ni gobernador Jerry Singson.

Pasarunson daytoy a reunion daydi Ylocos Kannawidan Ilocos Sur Bicentenial 200 a tawen idi Pebrero 2018 a naangay iti Vigan City nga inatendaran da Jun, Danny, Ben ken Amado a nakairamanmi a President Elpidio Quirino Leadership & Humanitarian Award, ken naisurotkami iti Medical Mission idiay Lidlidda, Ilocos Sur a kaduami da Appo Jerry Singson, Danny Villaruz, Jun Abinsay, Ben Cabreros, Tessie Aganon, kdpy.

Ita a bigat, dakami ti umuna iti linia dagiti VIP [no ania ti kayat a sawen ti VIP, ala, basta dakami kada dati a Hawaii Representative Felipe Abinay, Jr. ni Jean Jeremiah, aktibo iti city government ken pasado a presidente iti Oahu Filipino Community Council.

Bag checking. Impakitak ti naguneg iti pouchko.

Iti kaaddami iti linia, umuna a nakitak   ni nalatak a Filipino boxer Ben Villaflor, nagkinnomustakami iti nairut a dinnakulap. Ni Villaflor ti agdama a sergeant at arm iti Hawaii Senate.

Inwardasnakami ti maysa kadagiti ushers/volunteer, naiturongkami iti asideg iti entablado.

Madamdama, napasungadak ni John Gines Garcia, kontraktor ken am-ammok la unay gapu iti panagkadkaduami iti Knights of Rizal-Hawaii Chapter. Tubo iti Nagbukel, Ilocos Sur. Ken sigud nga aktibo iti politika idiay ilida a Nagbukel. Assideg nga agsaokami iti telepono ta kayatna a tulongak a mangbangon ti Nagbukel Circle of Hawaii & Associates.

Simmaruno a nakadinnakulapko ni dati a Councilmember Kimberly Marcos Pine, isu ti sigud a nangibagi iti City Council iti District 9- Ewa Beach, a nagpapaayak met iti Neighborhood Board #23.

Nakatugawkami iti sango- simmarunno a nakadinnakulapmi ni Director iti  Hawaii State Department of Transportation Jade Butay, [adda puonna iti San Nicolas, Ilocos Norte]. Ni Diretor Butay ti baro a direktor ti Hawaii Statee Department of Labor & Industrial Relations babaen iti panangdutok ni Governor Green. [Dati a nagtrabahuak met iti DLIR iti las-ud iti 10 a tawen 1994 -2005 kas Employment Specialist/Consultant].

Dadduma a nakadinnakulap ken kinasarsaritak da Jocelyn Agustin, maysa a kagagetan a kameng ti Gumil Hawaii idi 1990’s.

“Agsublika Manong, masapuldaka. Adu ti naitultulongmo.”

“Ket adda met opisialesyo. Riingenyo ti gimong, umayak no adda paskenyo.”

Nakitak ni Lucy Pascual-OFCC/UFCH secretary. Ni Lucy ti nanang ni nagMiss Oahu Filipina ken nagMiss Hawaii Filipina Margaret Pascual.2010.

Nakiretratokami ken ni Prosecutor Steve Alm.

Kasta met a nakipiktiurkami ken ni Councilman Augusto Tulba a mangibagi iti Council District 9.

Naiparang dagiti pasado a gobernador kas kada George Ariyoshi ken Mrs. Ariyoshi; John Waihee ken Mrs. Waihee; Neil Abercrombie ken Mrs. Abercrombie, Linda Lingle, ken David Ige ken Mrs. Ige.

Adda met iti tallaong da Kauai Mayor Derek Kawakami, Honolulu Mayor Rick Blangardi; Outgoing Maui Mayor Victorino ken Incoming Mayor Richard Bissen.

Iti liniami a makidinnakulap ken mangkablaaw ken ni Apo Josh Green, nakaliniami ni Shirley Templo, maysa met a suminsingising iti tay-ak iti politika iti beddeng ti Kalihi. Iti panagkunami, adda bituenna, adda masakbayanna, panawen ken gundaway ti mangipatungpal.

Nakunami kenkuana idi nayam-ammok ti bagik kas maysa kadagiti community volunteers. “We need your generation, new breed, new talent, new and fresh ideas, and make it into action. Our generation, the Silent and the Baby Boomer has contributed their part and that we can appreciate and acknowledge. So, keep on fighting try and try, keep trying, election comes every two years and never give up.”

Iti ruar iti arena, Naudi a nakadinnakulapmi ni kabbotos a US Congresswoman Jill Tukoda a mangibagi iti CD2. Dati a representante iti Estado iti Hawaii.

Paset ti programa ni Governor Josh Green ti pannakaikkat koma ti panagbuis ti magatgatang a makmakan, taraon ken medisina ta kas makitana a maysa a makatulong kadagiti nataengan ken nabbababa ti masapulanda.

Manamnama a nabungbunga koma ti baro nga administrasion. Kitaenna koma iti pannakadutok dagiti kualipikado a propesional kadagiti puesto iti gabinite, komision ken board, kas pakairamanan koma dagiti kadaraan a makapatar ken makagaw-at iti pagrukodan iti Blue Ribbon Committee no adda man.

No saankami nga agriro, nangrugi ti partisipasion ti Filipino iti politika idi 1954, umuna a representante iti Territory of Hawaii ni Atty Peter Aduja a tubo ti Vigan. Manmano ket narasay pay la idi iti partisipasion. Kadagiti simmaruno a basingkawel ti politika, immadu dagiti nakariing ken nagtarigagay a papili.

Timpuar ti ad-adu a partisipasion    dagiti kadaraan a naipuesto ken nadutokan kadagiti nadumaduma a board, commission ken Department Heads idi panawen da  Appo John Burns, George Ariyoshi, John Waihee, Ben Cayetano, Linda Lingle, Neil Abercrombie, David Ige.

Iti pammatimi, adu wenno adda dagiti kualipikado a propesional manipud kadagiti nadumaduma a grupo etniko ken sigurado a mairaman dagiti kadaraan a Filipino.

No ti kayat a sawen iti baro a panangrugi kas dinakamat ti baro a gobernador para iti administrasionna ket panagbalbaliw ken nadurdur-as, Nabatad met ti kari ni Teniente Gobernador Sylvia Luke iti ayatna a makitnnulong iti agpada a kameng ti State Senate ken House of Representative ken ti baro a gobernador. Sapay koma a nabungbunga iti ad-adu a pakairanudan dagiti umuli iti sapasap nga Estado.

Ala, sapay koma, kas pagsasao: aramid ti pakakitaan.