Las Vegas Connection With Love, Ditoy Siudad ti Sursurotek Nga Init

by Amado Yoro

Ditoy ti kunada a siudad
[Ti basol]
Pakawanennak, O, Ilik.
Ngem kapanagan iti kinalasbang
Ken kinapusaksak ditoy
kas iti rimat dagiti bituen ken
Iti silnag ti bulan.
Daytoy ti sabong
iti malem, sidiran Stober
suli ti Sand Creek
iti nagsulian ti Mark Twain
ken
Spring Mountain.
ditoy ti kunak a natnag
Ti darang ti init
Ti daga a disierto
ti gumaygayebgeb latta  a siudad
kas met ti maipalais nga alipaga
uray kadagiti naladaw
a malem
ngem adtoy met ti agkutkutimermer
a parbangon: ti lam-ek
ti puyupoy
dagiti nalamiis nga agsapa.
ditoy, wen, ditoy Cielo Alma
O, inay-ayat ken awan patinggana
Nga ayatenka iti labes ti kari
Ti ayat ken pammateg.
Ditoy nga itugkelko ti muhon
Ti baro a tugot ti kayumanggi
A dapan,
dapandapanak latta
A magna kadagiti lansangan
Ti Decatur; Lindell, Jones
Red Rocks
Tropicana,
Dagiti nagkurosan ti Blue Diamond
Ti Durango ken Flamingo
Daytoy ti plumak iti baro a
a pannakaparsua
iti sabali a punganay.
adtoy ti sabong
awanan iti nagan
adda pusaksak daytoy
kas met kaadda ti sugat
iti pannakaipusing sadiay
wen, sadiay nagpanawanta….
adda dagitoy: same
iliw
kawa
ken kawaw…
sangitak kadi ti kaawanko
sadiay…
ep-epan koma ti sungdo
ken linglingay dagiti pannakaikawa
isuda a mangpatibker-nakem
ditoyak a mangbirok
bubon ti gin-awa ken talingenngen
ditoy a suratek
dagiti un-unnoy ken
an-anek-ek
dagiti katkatawa
ken dagiti istoria de un amor
ti napalabas
ti sangalek a kansion
kasilpo iti kinasiak
duata: sika ken siak
iti sirok ti sursurotek nga init
a datonko kenka,
ken para kenka, O, Ilik.

Get the latest stories from Hawaii Filipino Chronicle straight to your inbox! Subscribe to our FREE newsletter here.