Ti Ayat ken Sakripisio Iti Labes Ti Nasudi a Kari Part 1

by Amado Yoro

Paset ti panagbiagko dagiti napateg a bambanag a napukawko iti Hawaii a nabukelko iti kinasiak kabayatan nga addaak sadiay iti aganay a limapulo ket dua [52] a tawen.

Nakail-ilala la unay kaniak gapu ta isuda ti nangrugiak, isuda ti namagbalin a pakabuklan a paset ti kinataok, propesion, trabaho ken iti komunidad.

Dagiti nadumaduma a gunglo wenno organisasion a pasetnak iti panagbangon, pananginaw, panangplano, panangiturong ken liderato babaen iti panagtalek dagiti kakadua a community oriented leaders, a nangirugi, nangigannuat kadagiti napateg a proyekto a pagimbagan iti kaaduan a kameng ken para iti sabali a tao.

Dagitoy a grupo sibiko, propesional, regional, provincial, community service, humanitarian ket pakaibilangan ti Lions Club International, .GUMIL Hawaii.

GUMIL Oahu, Timpuyog, Oahu Filipino Community Council, United Filipino Council of Hawaii, Order of Knights of Rizal, Annak Ti Sinait Iti Hawaii, Vigan Association of Hawaii & Associates, Honolulu Fil-Am Lions Club; Hawaii Fil-Am Media Council, Laoag City Circle, DWCLCAAH, Tri Media Council, Leeward Oahu Lions Club, Hawaii Lions Club, District 50;  Filipino Fiesta, Sinait Alumni Association of Hawaii, Ewa Neighborhood  Board, Friends of Ewa,  Ilocos Sur International Association and Foundation, ken dadduma pay.

Tagipatgek amin dagiti innak pannakipulapol kadagiti adu a gagayyem, ken dagiti padak a volunteers kadagiti nadumaduma a programa, proyekto ti organisasion katimbeng met ti nasarakak iti Las  Vegas, iti ibilangko itan a baro a daga, baro a komunidad, baro a taeng.

Adda ditoy ti kapatgan iti biagko, iti biagmi nga agassawa ti kakaisuna nga anakmi ken ti dumakdakkel a kameng ti pamiliana.

Isu ngata ti gasatko ken kaibatogak iti panagalla-allak. Panagkallautang. Kayat man ken saan, makikuykuyog ti adu nga utang. Utang a naimbag a nakem, utang pinansial.

Pannakayadayo iti lugar a nakairuaman, ti man daga a nakayanakak. Maysaak a tawataw, wenno bayanggudaw.  Addaan met iti bukod nga arapaap ken sirmata iti biag.

Iti sangkakunak: siak ti mayarig iti sasos, wenno umang, wenno upa nga agbirok iti kamangan.

Ita iti kastoy a kasasaadko, masubliak man ketdi dagiti luglugar a nagalla-allatiwak.

No adda mapanawak, adda mapukawko.

No sadino ti pakaisadsadak, adda met mabirokak.

Idi pumanawak idiay Tapao, Mayo 1966. Anaknak ti talon. Ordinario ngem nadayaw a kaamaan. Awan ti aniaman a balonko.

Saanko a binalon ti pungan ken ulesko. Saanko nga intugot ti iddak a papag a naaramid iti nakayasan a kawayan. Awan balonko nga ikamen.

Idi addaak iti siudad ti Pasay ken iti Manila, kaskasdi nga awan ti ikamen, pungan ken ulesko.

Nakipagyanak iti barongbarong iti igid iti agar-arek-ek a narugit a waig, ken iti sidiran ti sementerio iti La Loma Chinese Cemetery Tambunting, Binondo, Manila.

Nagtrabahoak a kas sulnit iti nagan a Genaro Guzman, Php 3.50 tunggal aldaw. Agkali iti tanem, agaramid, agsemento iti panteon. Turkiado a tarong, naimasen. Adda patis wenno bugguong, umanayen.

Iti kaaddak iti Laoag City, [1966-1970] kaskasdi nga awan ti nalamuyot a kama a nagiddaak. Daan a rikep ti tawa a naaramid iti kapis ken nagsusukot a karkarton ken ules ken moskitero.

Ditaak a nangkunnot kas iti panagkunnot ti maladaga iti suso ti inana. Kunnotek, sisipek ti anag ti napateg nga adal ket iti Divine Word College of Laoag a nangileppasak iti Bachelor degree, History Major.

Idi napanak iti Hawaii, awan doliarko. Kaaduan nga inutang dagiti ginastomi nga aggaama.

Kaaduan a paw-it dagiti naglaon iti maletak. Adda pindang a pusit wenno laki. Dinaing. Napagango nga ik-iket ken aragan [seaweeds]. Adda bawang. Bulong ti tabako.  Mabalin a tallo paris laeng ti aruatek.

Iti Hawaii ti nangrugiak a nangbangon ken nangbukel iti kinaasinok.

Nangrugiak iti nababa a kita ti trabaho iti plantasion ti kaunasan. Ultimo a Utility Field Work $2.10 per ora. Agikay-o ti daga, Agmula ti pulapula. Agsabidong. Agpadanum, ground flow, and drip irrigation. Bodegero. Naum-umsi ken nakatkatawaan.

Dayta la kanon ti kabaelak a trabaho,maysaak a degree holder. Naileppasko ti kolehio.

Naigamerak iti komunidad. Aganay a limapulo ket dua a tawen a naipulapolak iti komunidad. Kas nadakamatko iti pakauna, ibilangko nga adda pasetko iti komunidad iti Hawaii iti adu a banag a saanko a malipatan.