Denggem, Ala, Denggem Pay Ti Kantaniw
by Amado Yoro
Daytoy ti daniw
para kenka ti kanta
iti sabali a putar (dimon sa la ngamin marikna ti segga ken iliw ti ur-urayek a panagsublim a nabayagen a diak nakita ken nangeg) Seggaak a seggaan ti birtud ti init
kalpasan ti saan a
matmaturog a rabii
addaak agdawdawat iti Milagro
iti baet dagiti luluak
kadagiti nasapa a parbangon
umay ti agsuysuyaab nga agsapa
iti urayek nga agmatuon.
ti init agmatuon iti panagtindek
kas iti alimpatok ti pagorasan (Kayatko ti agbiag iti lagip uray iti Ipupusay ti malem dagiti sikikidem
A mata ti ayat ken arapaap)
Toy kanta para kenka met laeng
Ta ikkak ti biag ti kalman nga agsublika
Denggem, ala, denggem man pay
Ti samiweng
Ti harmonica
Ti napalabas
Ti agdama – ti kari – ti ayat –
(uray ti pasidumri wenno pasugnod) Nabirbirtud ti pul-oy a dumnges Ngamin ti musika nailaga ti kappia
Ti raya ti init.
Perngek ita met laeng ti isem
Ti init, kas iti arbis
Maidasayakto manen iti maysa a darikmat
Iti ungto ti pluma
Kas iti kansion
Ti daniw
Ti puso ti ayat
Ti epiko a maisurat
Adda biag toy kanta-daniw.
Ti birtud ti init: namnama
Ti birtud ti ayat: talna ken sirmata
Kaslaak manen agtutubo
Idiay Sta. Romana
Ta isublik met iti kinasiak.
