Ritmo Dagiti Agmartsa A Darikmat

by Amado I. Yoro

Gamdek koma nga igawid
Ti panagbitek ti oras

Wenno tawaran darikmat ti
panagpallayog ti pendulum

Ngem bay-am nga umaskaw
Ti dapan dagiti agmartsa a darikmat
Ti biag. Denggem ti awis ti trumpeta
Ti waragawag siak met ti guyoden
Ti libut a sumurot ti adding
Ti umay a panagbalbaliw ken panagdur-as

Saanka nga agdalikepkep iti suli ti siled
Rummuarka iti iddam iti
siled ti panagmaymaysa
Adu ti aramid iti ruar
A mangmaris ti aldawmo
Iti man balay dagiti homeless
Kadagiti panagpakan iti lima ribu

Kitaem dagiti nakatanggaya nga ima
[adda kuttongi, kublang, cursing wenno muldotan]

Adda salikad ti liday, uray kangkang a kilabban
isakmolnanto latta a pamedped
kenka ti asi-ayat no regregam ti sensilio
wenno sangapedaso ket mariknam ti rag-o
umaddangka, umangeska

Pagam-ammuan agmatuonen
Iti sabali a kirem aglikig manen
Dagiti agsalog a darikmat yegna ti rabii

Saan a barengbareng ti biagmo
Kadagiti aramid a naisingay

A saanmo nga impaidam
Ita nga adda pay gundawaymo
Nga umaddang iti umas-asideg
Nga uged ti pangngeddeng iti isusuko.