Ditoy Katipunan Maysa A Leyenda Ken Pakasaritaan

by Amado I. Yoro

Adda lagip ditoy,
Daan a pakasaritaan, sibibiag
Ti sariugma ti Ganonggong
adda kappia ditoy
Ti ugma a Cangitingitan iti naamo a pul-oy
yeg dagiti dalluyon…
umay ti agmatuon, umay pay iti 
panagligsay ti init
sumaruno ti panagpakada ti init ditoy…
ditoy a manggungunggon a daga, ti darat
ti kadaratan

adda biag iti kadilian,
iti katangriban, dagiti nabiag a lames

adda talna ditoy iti sallukob ti kappia
adda kayaw ditoy iti ayamuom ti sabong,

ti ayamuom ti ruot-baybay,
adda daniw ditoy kas panangtaliaw

ti away a nakayanakan
agsubliakto manen

iti sabali a gundaway, say-opek ti puyupoy iti kadaratan
kas pannakailili ti inosente a maladaga,
adda iliw ditoy, kaanonto manen a maep-ep,
adda kaibatogan ditoy
nasudi a balikas: Ay-ayatenka !  

About Author

admin

See author's posts