Ti Ayamuom Dagiti Daniw Ni Amado Yoro
by Amado Yoro
This poem is about the song of love to a loved one. Wandering one place to place, searching for fortune. There is hope over the rainbow, a better place, a better life. And this is an elegy to my dear brother who died from COVID-19, the 14th victim in Hawaii.
Ayamuom 200
Ti salmo, ti ayat ken ti puso ti pluma
kansionanta ti ayat
ket ti langit aggarakgak
a mangyaw-awan ti bisin
maalep-ep ti apuy dagiti agpalakpak
a karayan; malmes ti buteng
ket umisem ti bulan, makeltay ti damask
ti init patibkerenna ti biag
iti panagibtur.
nasudi latta ti kanta iti bullallayaw
agallin ti bato; mabangon ti templo
ket ti samiweng
maallingag manen
a maibuyog iti dayyeng ti pul-oy
timudem met ti nakurapay
ngem naimpusuan a kansionko
kadagiti tarakitik ti tudo
a kayatmo a tukmaan.
Riknaem ti anem-em ‘toy ayat
Dagiti mayurit a daniw
Toy nagtagipuso a pluma
Nasudsudi pay a denggen
Ti salmo ti kappia
A nangyaw-awan ti apas
Ken panagduadua:
Daytoy ti puso iti pluma
ti pluma iti puso
toy maysa a bayanggudaw
iti nagtawataw a kari
lumaem itoy a taeng
kas iti silulukat a libro.
Para ken kadaytoy: daton
iti sakaanan dagiti agrubuat
nga agsapa iti maulit-ulit
a pannakaipasngay baro a biag
iti baro a gundaway.
Ayamuom 201
Elehia ken ni elias
Lunes, Abril 24, 2020
Kebba kebba ti lagip ken umel a panagsangit
ala wen, kabsat, ta naikari
naikari kenka iti kastoy a pannnakaipusing akuek, wen, akuek, adda same
iti kastoy: kastoy ti saem,
kastoy nga iwagatko ti same
ammok, ammom met ti pategmo
sika ngamin ti kaaduan gundaway
a nadendennaakiti kinaubing, iti kinaagtutubo
sipud pay dagiti nasirayanta a rayray
ti init iti Tapao,iti biag iti Tapao,
dagiti naglasatantayo a tuok
karit ken pannubok iti panagubing
idiay Tapao umok ti arapaap
dagiti sirmata ken darepdep
iti sidong dagiti kakabsat:
Edilberto, Bonifacio, Rosita,
iti sidong ti balay a pinan-aw
didingna a tinidtid, iti basarna a kawayan
iti arubayan ti dadapilan, iti lawlaw ti anawang,
iti sidong ti dua ti akemna nga ina-ama Tosong, nasapa a nagpakada ni Ina Romana.
Maipasdek a rangtay iti sirok ti bullalayaw: Hulio 30, 1971 duata met la
a bimmallasiw iti kunada a glorya
ti Paraiso iti Hawaii
sika ti kapautan a nakadendennaak
Marso 24, 2020 naudi a nakitak ti isem
ken kadagita sibibiag a matam…
agasem, wen, agasem ti singed
iti labes iti panagkabsat
agasem ti sakripisio ti biag ken ayat
ta sika ti kaduak a nangbangon ti rangtay
iti mangliwengliweng a taaw
dagiti agballasiw kas iti ayat ken sagut
sika-siak, duakami, sika ken ni ay-ayatem
ni naanus ken naayat a kinabinnulig
sudi ni Namnama
kaduadakayo a nakipagbangon ti rangtay
iti dua a murdong ti namaris a bullalayaw agnanayon a panagyaman iti ayat
wen, kabsat, ti saem, mapunasto
iti bukodna nga ipapanaw
ngem ti lagipko, ti lagip kenka
lagip latta gapu kadagiti aramidmo
a kinaimbag, iti namsek ken napno iti ayat dagiti tugotmo mapunasto iti katapokan
uray ti anniniwanmo agpukawto met
ngem ti biag, iti immortal a lagip
ibatim a sika ti sika: kabsat sika ti lagip sibibiag a lagip kadagiti aramidmo.
Maika-14 a biktima ti Covid-19 pandemia a kaso iti Hawaii Abril 24, 2020
Queens Medical Hospital-Honoulu-Mililani Cemetery Mayo 30, 2020
