Tapao: Dagidagi iti Kinasiak -3

by Amado Yoro

Tapao 3: Kayaw
Sirmataek, wen, sirmataek ti sabali
A panangmatmat iti pakabuklam
Sarmingka koma a pagtamdak
Ket birbirokek ti sungbat ti saludsod:
Naipasngay kadin ti sabali pay
Nga adipen da Lam-ang ken Bucaneg?

Kitkitaek, wen, urayek met
A rumayray ti tarigagay ken essem
Da Eric, Allan ken Sherlyn a nagkuna:
“kayatmi met ti agsurat, angkel
bareng masurotanmi ti tugotmo”
dakkel ti namnamak nga agbukarda
a kas iti sabong nga imbatik
a manuskrito iti “kasano” ken wen
makasuratka met
daniw, sarita, salaysay ken prosa.

Ammok: nabakbaknang ti bugas
Iti nakaparsuaan a kayaw ti pluma:
Ti kalipkip, ti barikir, ti Pikkan a nagsusuon
Iti riniwriw a balitok ti talon,
Adda orhinal a ladawan ti bahay-kubo;
Agduma ti balor ti pan-aw ken galbasim;
Ti datar a kawayan ken baldosa
Imutektekak ti tinidtid a bulo ken kawayan
Adda kinabirhen ti away ken iti kinamintalon

Akuek: tugot ti panaglupos daydi ipapanaw.
Ibulosko ti nawaya nga anges-bang-ar
Awan ti pulosion ditoy nadam-eg a surong
Ti baresbes ti sibibiag nga ubbog
Sakduen, wen, sakduen ti sursuro
suroten ti tugot ti maysa a panawen.

About Author

admin

See author's posts