SADINO TI PAPANAM MANG ANGKUAN: Kayumanggi a Gurong

by Amado I. Yoro

Ket sirmataem iti adayo a masakbayan
Iti awan makaibaga ti ungto daytoy a dalan
Naiwayaten ti desdes a daliasaten ti dapan
A tapoktapok iti awan patinggana a kalsada
Wenno karayan ti biag dagiti agpagpagna
Tapno kargaenda ti kinasiasino ken bukod a rupa.

Agtaytayyek a kanayon ti ligay ti panawen
Tapno iparangda dagiti masukansukat a pagteng
Ti panaglupos kakuykuyog  sabali a pannakasukog
Iti saan nga agressat a panagdaliasat dalan a nawatiwat
Ket dagiti agbambaniaga awitenda latta ti dagsen ti krus
Ti agud-uddog a parola ti biag iti panaglayag.

Saanmo a saludsoden no sadino ti panungpalan ti biahe
Agkamkamat latta ti panagalla-alla ti agtultuloy a serye
Lamolamo latta ti bulan; aglinling-et latta ti ili
Iti awan sardayna a paratignay;  ti saka nga agkutikuti
Iti taaw man wenno iti takdang; agpallayog latta ti kari
A pumangal-kumalatkat sabali pay a pangal ti balligi.

Sika ti sibibiag a daga a magna desdes a naiwayat
Addaan natibker a duri, bael, takder a tawid iti puli
Saanka a karikatura, ketdi sika ti agbibiag a bida iti drama
A kasilpo ken sulbod ti agtultuloy a panagkallautang
Magnaka! Wen, ala, magnaka, kayumanggi a gurong
Iti tibker ken kinasaranta iti panagtakuat-adbenturera
Iti sabali a let-ang; sabali
Iti ngumatngato a panirigan;  lubongmo lumawlawa.

Siaawitka man iti krus iti bukodmo a kalbario
Agatipukpok latta ti dalan iti panaglupos ken progreso
Nailet-nasiit man dalan dalepdepen sumlep a ling-etmo
Ngem magnaka, ala, umaddangka,  kargaem ti namnama
Iti pannagnam mabirokamto met pudno a kaibatogam.

Agkaradapka  man iti barukong ti daga a kas ganggannaet
Dadduma awan ti sarian ti init ngem ti sinamarna itdennanto
Ti direksion a sursurotem ibagnosnanto
Ta saanka nga agkarkarawa ken agpugpugto
Wenno lingka ti sirib ngem agbukarka a parupa iti baelmo
Ket iti kinaganggannaetmo iti gimong adda latta lugarmo.

Sirigem iti a-adayo a masakbayan: arapaap
Iti kaipapanam agtakderka iti husto a pagannurotan: sirmata
Agtakderka iti bukodmo a dapan ken pagsiriban: prinsipio
Tangsit ti pulim; ti daram-ling-et a mangimarka iti nagan: puli
Ta dagiti panagalla-allam sinakruymo latta daeg, pintas ti tinubuam: kultura ken kaputotam.

Ket taliawem ti ilim; puon met ti sibilisasion ugma ken dur-as
Dagiti umad-addang a panagbalbaliw nabiagda a pagwadan
Masansan latta a perngem ti init ti namnama a bimmeggang
Ti nagsilpo nga arapaap-sirmata daytan ti kaibatogam
Maimarka met itoy a daga ti sudi ti naganmo iti tugot a paglasatam.

Leave a Reply

Your email address will not be published.

This site uses Akismet to reduce spam. Learn how your comment data is processed.