Ditoy Siudad Ti Init Agmulaak Latta

by Amado Yoro

manen, ti panagmula
awan ti pilienna a panawen
awan pilienna a disso
ita, agmulaak latta, manen
ta adda pay bin-i
dagiti bin-i iti kamalig
iti lansad ti barukong ni ayat
ti panagmula kas met iti panaginaw
iti arapaap umayda iti sin-aw
ti panagmulak ikutkotko a saggaysa
sa dua, sa tallo, ken agsasaruno
ditoy naulimek a siledko
agkankantaak
ditoy siledko, agsursuratak
agburburayok ti riknak
adda iliw
adda pannakaikawa

kas tinta iti plumak, sumrek a bukel
sibogan ti ayat, adda namnama a nasippukelkel
agmulaak ita a kadam-eg ti daga
umay ti panagsikog arapaap a nasadia
ti imulak: ayat; iti daga awan pay saluyot
ngem rinugiakon nga imula
ti iwarisko iti kadagaan: ayat
ayat, daytoy ti imulak
imulak daytoy iti namnama a nasimgat
yawatko ita ima: bin-I ken bukel
yawatko iti sab-okmo: biag ken rimat
agmulaak manen: awatem ti bin-i
imulak ti bukel: tagikuaem ingget pateg
daytoy ti mulak: ayat
ti panagmula, panawen ti amin a panawen.