Ti Ayat ken Sakripisio Iti Labes Ti Nasudi a Kari Part 2
by Amado Yoro
Nasarakak ti pusok iti sidong dagiti annak ti kakaisuna nga anakmi.
Iti nalaus a panagkedkedko nga umay ditoy Las Vegas, isu met iti pannakalunag ti pusok iti kalikagum ti kakaisuna nga anakmi nga umaykami ditoy tapno as-asideg iti ayanda a sangapamilia.
Nangnangruna pay iti kalikagum ni Gloria gapu iti kastoy a kasasaadna. Abus man pay ta agpapaimbag, now in her five years in road to recovery, mailiw kano la unay kadagiti tallo nga appokomi.
Napukawko ti St. Paul’s Episcopal & Philippine Independent Church [Iglesia Filipina Independiente] iti Queen Emma Square Honolulu, Hawaii a nagserserbianmi nga agassawa kas aktibo nga opisial aganay wenno sumurok a tallopulo ket siam [39] a tawen no inrugimi iti1984, nagserbiak kas Bishop Warden [presidente] iti simbaan 1991-2007] iti panangimaton ken panangtarabay dagiti tallo a papadi a nagsisinnnukat da Rev. Fr. Tim Quintero, Rev. Imelda Padasdao, Rev. Canon Randolph VN Albano, iti tallo nga Obispo da Rt. Rev Donald Hart, Rt. Rev. Richard Chang, Rt. Rev. Robert Fitzpatrick ngem nagasat ta nasarakanmi ti Epiphany Episcopal Church ditoy nagsulian ti Cactus Ave/Gillespie St. Las Vegas, Nevada.
Napukawko dagiti fellow volunteers kadagiti adu nga aktibidad iti Hawaii pakaibilangan iti Feed the Homeless, Adopt a Highway iti Farrington Highway Waipahu, Kalihi Street ken Likelike Highway, Kalihi, Ti Hawaii Food Bank, Life Savers Club, Blood Bank of Hawaii, The Tree Planting for Life; Make America Beautiful, Bus shelter construction, Graffiti Buster Program, Weed & Seed with Narcotic Division, Honolulu Police Department, painting school bletcher, painting the house of the blind, Feed the Orphanage, Feed the Elderly, Walk for Life ken dadduma pay ngem naigasatak ta nasarakak ti Food Bank & Distribution ditoy Stober Blvd, Las Vegas, Nevada.
Napukawko ti ABC Group Burger King Coffee Hour a kaduak pakaibilangan da sigud a State Representative Romy Mindo, Grand Knight ken Union ang Manunulat sa Pilipias [UMPIL] Awardee, Pedro Bucaneg Awardee Francis Ponce, Pat Bolo, Hermie Estrada, Martin Mendoza, Virgilio Banda, kdpy, adda Billiard gameko inaldaw malaksid iti Sabado ken Domingo.
Namissko dagiti nasayaat a dodoktor pakaibilangan da Dr. Charlie Y. Sonido, Dr. Lo, Go, Bautista, kdpy, ngem ketdi adda met dagiti nalaing a dodoktor ditoy pakaibilangan da Dr. Dizon, Dr. Avelar, kdpy. Adda met ramutda a Filipino a kas kaniak.
Nayadayoak iti kakaisuna a kabsatko a babai ken dagiti kakaanakak ngem itan kas katimbeng dagiti napukawko, nadennaanmi ti KAKAISUNA NGA ANAKMI ni Cheryl Lei Balcita ken ti pamiliana.
Iti walo a bulanen a kaaddami ditoy Las Vegas, saanak pay a nakapasimsimpa. Kaslaak agkarkarawa ken agmatamata pay laeng ditoy. Sadino ti daya a taudan ti init ken iti laud a lennekan ti init; ti abagatan iti gagan-ayan ken amianan iti Big Dipper. Adu pay ti birbirokek.
Masapul met ti naan-anay a panawen.
Panangidilig nagdumaan wenno adda panagpada iti lugar.
Iti bukodko a pammaliiw, sabali ti Las Vegas iti man paniempo, iti napalaus a kinapudot; kasta met iti agkutkutimermer a lamiis.
Presio dagiti magatgatang, taraon, aruaten, nalaklaka la ti presio ket makatulong iti aginaldaw a panagbiag.
Adda ketdi makitak kadagiti bukodko a mata, adda panagpada ti Hawaii ken Las Vegas.
Maibilang dagitoy. dagiti street people, dagiti homeless. Addada iti sulsuli iti kanto, karenderia, iskinita. Adda met dagiti sapawsapawda kas iti man daan nga ules, tolda, karkarton. Iggemda ti dakkel wenno bassit a pedaso a karton, naisurat. I need help. I am Hungry. God Bless.
Numan pay saanak pay unay a nakapagpaspasiar ditoy, dagiti ketdi nakitakon dagiti sumagmamano a pagtagilakuan, restauran, ken dadduma a negosio, kukua ken imatonan dagiti kadaraan.
Adda ketdi metten dagiti supermarket, grocery stores a napaspasiarko. Kas kadagiti pagtagilakuan met iti Honolulu, aglalo paset ti Kalihi, Waipahu, Ewa, nakita dagiti bukodko a mata dagitoy sumagmamano a tagilako iti uneg iti tiendaan, maibilang dagiti: puraw a bindunggo [white tripe], ginarapon wenno naibotelia a papait, karaykay ti manok, saba, natnateng, tirem [oyster], napagbalay a dara ti baboy, longanisa, igad ken dadduma pay a kagusgustuantayo a Filipino, aglalo dagiti kapadak nga Ilokano.
Nupay saanak pay a nakikamkameng kadagiti gunglo Filipino ditoy, adda naammuak nga Ilocano American Association in Nevada [IAAN], segun iti nabasak nga impormasion ket addaan iti aganay a sangapulo ribu a kamkameng.
Ket nupay saanko pay a nakontak, ngem kadagiti masungad nga aldaw, ikagumaakto a kontaken daytoy nabasak a maysa ken kakaisuna nga UMUNA a FILIPINA a kameng iti Nevada Assembly [Legislature] a segun ti nabasak adda ramutna manipud iti Mindanao.
Iti Hawaii, ni Atty. Peter Aduja, tubo ti Vigan, ti umuna a Filipino a nagkameng iti Territory of Hawaii Legislature idi 1954-1958.
Kangrunaan nga ibilangko a kapatgan a gameng a nasarakak ditoy kunada a siudad ti basol, wenno siudad ti disierto, ditoy sirok ti sumsumged ken dumardarang nga init, isu a sinursurotko: THE BEST OF THE BEST OF ALL TREASURE, I have found, for me, ni Gloria ken siak addakamin a mayasideg iti kakaisuna nga anakmi ken ti pamiliana. Awan ti baet a taaw ken rinibu a milia.
Adda talged, adda talek, no balitok man dagiti napukawko idiay Hawaii, nabirbirtud, nabalbalor ti nasarakak ditoy: EUREKA: nasarakakon.
I’ve found it, a bunga ti The Love and Sacrifices, beyond the promise “I do”, and the Cameliajos Offspring: Anak, Manugang, Ina, Ama, Appoko, ditoykami kas pamilia.
